"Fulltrúar SPALAR, íslenskra stjórnvalda, verktaka og innlendra og erlendra fjármálastofnana undirrituðu í dag alls um 40 samninga vegna fyrirhugaðra jarðganga undir Hvalfjörð. Framkvæmdir hefjast á næstu vikum og á að vera lokið snemma árs 1999.
Hvalfjarðargöngin verða 5.770 metra löng með tveimur til þremur akreinum. Þar af verða sprengd göng undir sjó 3.750 metrar að lengd.
Hvalfjarðargöngin stytta leiðina frá Reykjavík til Akraness um 60 kílómetra og aksturstímann um 40 mínútur. Leiðin milli Borgarness og Reykjavíkur styttist um 42 kílómetra og ferðalagið um 30 mínútur.
Verktaki er Fossvirki sf., sem er sameignarfélag Ístaks hf., sænska verktakafyrirtækisins Skanska og danska verktakafyrirtækisins E. Pihl og Søn. Þessi þrjú norrænu fyrirtæki hafa áður starfað saman við verkefni hér á landi, svo sem við virkjun Hrauneyjarfoss og Blöndu og síðast í Vestfjarðagöngum.
Göngin kosta fullbúin 4.630 milljónir króna, að meðtöldum öllum undirbúnings- og fjármagnskostnaði á byggingartíma. Bankar erlendis og hérlendis lána alls 4.124 milljónir króna til framkvæmda á byggingartímanum og annar stofnkostnaður er fjármagnaður með hlutafé og lánum úr ríkissjóði.
Gert er ráð fyrir að innheimta veggjald til að borga mannvirkið og standa undir rekstrarkostnaði. SPÖLUR var stofnaður 25. janúar 1991. Sex hluthafar eiga 87.7% hlutafjár: Grundartangahöfn, Sementsverksmiðjan hf., Íslenska járnblendifélagið hf., Skilmanna-hreppur, Vegagerðin og Akranesbær.
Gerð Hvalfjarðarganga hefur verið undirbúin rækilega hérlendis og erlendis undanfarin ár í samráði við færustu sérfræðinga á hverju sviði. Niðurstaðan er sú að verkefnið sé tæknilega mjög vel framkvæmanlegt og ennfremur að umferðin muni skila nægilega miklum tekjum til að greiða kostnað og skila arði. Hagfræðistofnun Háskóla Íslands segir til dæmis að göngin séu ein hagkvæmasta stórframkvæmd í samgöngumálum á Íslandi og áætlaði að þjóðhagslegur ávinningur af þeim væri um 7.100 milljónir króna. Þar af væri ávinningur neytenda um 4.500 milljónir króna.
Áhætta á framkvæmdatíma hvílir öll á verktaka og fjármálalegum bakhjörlum hans. Verktaki sér alveg um að fjármagna verkið, þar til því er skilað fullbúnu til verkkaupa eftir tveggja mánaða reynslurekstur ganganna. Þessi fjármögnun er í höndum erlendra og innlendra banka. Verkkaupi fær í staðinn, við undirskrift samninga, greiðsluábyrgðir frá þeim sem fjármagna mannvirkið til lengri tíma.
Bandarískt líftryggingafyrirtæki, John Hancock, Mutual Life Insurance Inc., tekur að sér stærstan hluta langtímafjármögnunar verksins og kaupir skuldabréf fyrir um 2.600 milljónir króna. Innlendar fjármálastofnanir sjá um langtímafjármögnun að öðru leyti, einkum lífeyrissjóðir. Landsbréf hf. sjá um að selja skuldabréf til lífeyrissjóða fyrir alls 1.788 milljónir króna. Erlend langtímalán verða veitt til 20 ára frá því rekstur ganganna hefst. Gert er ráð fyrir að innlend skuldabréf verði greidd upp innan 15 ára og hlutafé á 20 árum frá því rekstur ganganna hefst. Ríkið fær síðan mannvirkið afhent án endurgjalds og hefur þá haft um 2 milljarða króna á núvirði í skatttekjur af fyrirtækinu.
Fréttatilkynning 22. febrúar 1996"
Athugasemd: Vakin skal athygli á að tölur um lengd ganganna eru ekki nákvæmar í fréttatilkyunningunni hér á undan. Tölurnar breyttust lítillega þegar á hólminn var komið og eru réttar hér. Fréttatilkynningin er hins vegar sögulegt plagg og birtist því orðrétt til að hafa í heiðri siðareglur sagnfræðinnar!
