Spölur - Hvalfjarðargöng

Norskur starfsmaður Fossvirkis slapp með skrámur og mar þegar 20 til 30 kílóa steinflaga féll á hann í Hvalfjarðargöngunum að kvöldi 15. júlí. Steinninn lenti á höfði og herðum mannsins og vafalítið bjargaði öryggishjálmurinn lífi hans. Óhappið átti sér stað að sunnanverðu í göngunum og maðurinn var fluttur til rannsóknar á Sjúkrahús Reykjavíkur. Hann er kominn til starfa á ný í göngunum. Norðmaðurinn hefur starfað í nokkur ár hjá Fossvirki, m.a. við Vestfjarðagöngin. Þrjú óhöpp hafa orðið í Hvalfjarðargöngum frá upphafi framkvæmda þar sem grjót hefur lent á starfsmönnum og minniháttar meiðsl í öll skiptin. Jarðgangagerð er þess eðlis að alltaf er hætta á einhverju hruni úr berginu. Öryggiskröfur við verkið eru miklar og strangar. Enginn fer inn í göngin nema með hjálm á höfði, hvort heldur það er starfsmaður eða gestur á svæðinu.