Spölur - Hvalfjarðargöng

Dagskrá vegna formlegrar opnunar Hvalfjarðarganga laugardaginn 11. júlí nk. hefur tekið á sig endanlega mynd. Athöfnin hefst með því að ekið verður með boðsgesti í gegnum göngin kl. 14:00 frá suðri til norðurs. Við norðurmunna flytja síðan ávörp þeir Davíð Oddsson forsætisráðherra, Páll Sigurjónsson stjórnarformaður Fossvirkis og Gísli Gíslason stjórnarformaður Spalar. Lúðrasveit Akraness og Karlakór Reykjavíkur flytja tónlist.

Að athöfn lokinni er farið með boðsgesti í fólksflutningabílum til hátíðarsamsætis um borð í Akraborginni í Akraneshöfn.

Efnt verður til Hvalfjarðargangahlaups sama dag klukkan 16:00 en klukkan 19:00 verða göngin opnuð almenningi. Þá og næstu daga geta landsmenn ekið í gegn ókeypis og kynnst af eigin raun ágæti þessa einstæða samgöngumannvirkis.