Laugardaginn 27. júní urðu þau kaflaskil í sögu heimasíðu Hvalfjarðarganga að gestur nr. 10.000 kom þar í heimsókn. Við þökkum honum innlitið, sem og öðrum gestum og velunnurum síðunnar og Hvalfjarðarganga.
Þetta þýðir að nákvæmlega 20 manns að jafnaði hafa frá upphafi komið í heimsókn á dag. Í raun er straumurinn mun stríðari nú í seinni tíð en fyrstu mánuðina og hefur einu sinni losað þúsund manns á tveimur dögum, eftir að Morgunblaðið vitnaði í upplýsingar á heimasíðunni og birti veffangið. Heimasíðan fær talsvert af bréfum með athugasemdum og fyrirspurnum af ýmsu tagi, líka erlendis frá. Áhuginn fyrir Hvalfjarðargöngum er greinilega mikill og vaxandi eftir því sem dregur nær opnun.
Við munum halda heimasíðunni við stundarkorn í viðbót, fram yfir hátíðlega opnun ganganna en hvað þá tekur við veit nú enginn. Heimasíða Hvalfjarðarganga er ekki á vegum Spalar ehf. eða annarra fyrirtækja sem tengjast framkvæmdum í Hvalfirði. Þessi heimasíða var á sínum tíma búin til að frumkvæði kynningarfyrirtækisins Athygli og í samstarfi við G. Valdimar Valdimarsson kerfisfræðing frá tölvufyrirtækinu Ferli og Guðmund Rúnar Lúðvíksson, myndarlistarmann. Umsjónarmenn síðunnar hafa verið í seinni tíð Atli Rúnar Halldórsson og G. Valdimar Valdimarsson. Þetta var hugsað sem tilraunastarfsemi og reyndar þekkjum við sem að henni stöndum ekki sambærilegt íslenskt uppátæki á Vefnum. Nokkrum fyrirtækjum var boðið að styrkja síðuna og rekstur hennar til loka árs 1997 með því að greiða fyrir tengingu með fyrirtækjamerki. Það er áhuga þessara fyrirtækja að þakka að við lögðum af stað og höfum haldið þessu úti. Ákveðið var síðan að framlengja líf heimasíðunnar núna fram á sumar, með stuðningi Spalar.
Undirsíður
