Spölur - Hvalfjarðargöng

Jónas er löngu horfinn af ritstjórastóli DV og tekinn til við að stýra hrossablaðinu Eiðfaxa. Hins vegar er hreinn óþarfi að gleyma skrifum hans um Hvalfjarðargöng, sbr. það sem hér kemur á eftir. Ástæða þess að fúkyrði Jónasar eru rifjuð upp er forystugrein í DV í dag, þar sem núverandi ritstjóri mælir beinlínis gegn fyrirrennara sínum í málflutningi um göngin.

Rifjum fyrst upp sýnishorn af skrifum Jónasar.

Forystugrein í desember 1995:

„Eftir fyrri reynslu af jarðgöngum á Íslandi getur engum heilvita manni dottið í hug að verkið undir Hvalfirði gangi vandræðalaust. Og hliðstæð reynsla annarra þjóða sýnir að fjárhagsáætlanir slíkra verka eru út í hött. Við erum því ekki búin að bíta út nálinni?“

„Auðvitað er miklu heppilegra og hagkvæmara að leggja fínan veg um Hvalfjörð og niðurgreiða ferju mlli Reykjavíkur og Akraness heldur en að borga 800 milljónir króna í veg að Hvalfjarðargöngum og taka á sig áhættu af að fá í fangið skuldasúpuna af sjálfum göngunum.“

„Þátttakan í ruglinu kemur í veg fyrir almennilegan veg um Hvalfjörð og kippir grundvellinum undan rekstri niðurgreiddrar Akranesferju. Öll eggin lenda í einni körfu Hvalfjarðarganga. Engin leið er að henda reiður á fórnarkostnaði þjóðfélagsins af breytingunni.“

Forystugrein í febrúar 1996:

„Til marks um þýlyndi Íslendinga má hafa, að engin samtök grípa til varna gegn Hvalfjarðargöngum. Fólk tuðar gegn göngunum í hornum sínum, en notar ekki samtakamátt til að koma í veg fyrir, að göngin verði að einni helstu martröð þjóðarbúsins á næstu árum.“

„Ef Íslendingar væru ekki þýlyndari en aðrar þjóðir, létu þeir ekki rugl af þessu tagi yfir sig ganga hljóðalaust. Stofnuð væru samtök til að gæta hagsmuna skattgreiðenda og vegfarenda til þess að berjast gegn því, að vandræðin yrðu meiri en þau eru þegar orðin.“

„Stofna þarf virk almannasamtök til að vernda viðhald og framkvæmdir við veginn fyrir botn Hvalfjarðar og hindra frekari ábyrgð skattgreiðenda á göngunum.“

Þessi skrif Jónasar hafa nú verið úrskurðuð ómerk í DV! Þetta kemur fram í forystugrein í dag þar sem kveður við annan tón en áður. Þar segir orðrétt:

„Harður dómur leiðarahöfundar DV stenst ekki dóm sögunnar. Hvalfjarðargöngin hafa reynst einhver skynsamasta framkvæmd í íslenskum vegamálum í áratugi. Skiptir litlu hvort mælikvarði fjárhagslegrar arðsemi er notaður eða þau jákvæðu áhrif sem göngin hafa haft á Akranesi, í Borgarnesi og um allt Vestur- og Norðurland ? að ekki sé talað um það verkfræðilega afrek sem liggur þar að baki. Þeir sem hæst töluðu og börðust harðast gegn Hvalfjarðargöngum þegja á fimm ára afmælinu.“

„Hvalfjarðargöngin hafa einnig sýnt það og sannað að einkaframkvæmd getur verið skynsamleg leið til að fjármagna framkvæmdir sem ríkið hefur fram til þessa séð alfarið um. Einkaframkvæmd hefur rutt sér til rúms hér á landi, enda úrtölumennirnir sjálfir farnir að skilja kosti hennar. Allt frá byggingu skólahúsa til vegamannvirkja og hjúkrunarheimila hefur leið einkaframkvæmdar verið valin með góðum árangri.“

„Forráðamenn Spalar hf. sýndu ótrúlega framsýni með Hvalfjarðargöngunum. Þeir gengu þvert á skoðanir meirihluta þjóðarinnar og sýndu og sönnuðu að meirihlutinn hefur ekki alltaf rétt fyrir sér. Og það var á brattann að seækja í opinberri umræðu enda á stundum hart sótt að Spalarmönnum. Þeim mun ánægjulegra hlýtur það að vera að sjá draumana rætast með jafnglæsilegum hætti og raun ber vitni og fá fullvissu fyrir því að á stundum getur einstaka leiðarahöfundur dagblaðs haft rangt fyrir sér.“