Þetta kom fram í máli Stefáns Reynis Kristinssonar, framkvæmdastjóra Spalar á aðalfundi félagsins á Akranesi í dag, 20. nóvember. Tryggingar ganganna kostuðu 19 milljónir króna á ári áður en hryðjuverkamenn réðust á New York og Washington en snarhækkuðu í kjölfar þess atburðar og eru nú orðnar þrefalt dýrari en fyrir hryðjuverkin. Þessar tryggingar er Speli skylt að hafa samkvæmt samningi við lánveitendur sína.
Rekstur Hvalfjarðarganga skilaði hagnaði upp á 51,1 milljón króna á liðnu rekstarári en 183,2 milljónum króna í hagnað á fyrra rekstrári. Framkvæmdastjórinn nefndi nokkrar ástæður fyrir minni hagnaði nú en þá:
- hækkun tryggingariðgjalda,
- aukinn viðhaldskostnað og rannsóknarkostnað vegna framtíðarviðhalds,
- verulega meiri fjármagnskostnað vegna gengisbreytinga; aukningu um 146,5 milljónir króna frá fyrra ári.
Spölur skuldar alls um 6,2 milljarða króna. Skuldirnar lækkuðu um 200 milljónir króna á liðnu rekstrarári. Fyrir lok ársins 2003 verður greiddur hátt í hálfur milljarður króna af langtímalánum félagsins og í lok ársins 2004 gerir Spölur að fullu upp við íslenska lífeyrissjóði sem lánuðu til gangagerðarinnar. Síðan verður greidd skuld við íslenska ríkið. Fari svo sem horfir lýkur Spölur við að greiða allar skuldir sínar á árabilinu 2014-2016, nokkru fyrr en gert var ráð fyrir í langtímaáætlunum um rekstur Hvalfjarðarganga.
Bæjarstjórarnir á Akranesi og í Borgarbyggð koma báðir við sögu í stjórn Spalar. Gísli Gíslason, lengst til vinstri, er stjórnarformaður og Páll S. Brynjarsson, sem næst Gísla stendur, er varamaður stjórnar. Páli á vinstri hönd er Stefán Reynir Kristinsson, framkvæmdastjóri Spalar og þar næst er Teitur Gústafsson, aðstoðarfjármálastjóri Ístaks hf. Lengsti til hægri og aftan við fjórmenningana á myndinni er Jónas Aðalsteinsson, lögmaður Spalar og fundarstjóri á aðalfundi félagsins.
