Hvalfjarðargöng voru lokuð í nær tvær klukkustundir í gærkvöld vegna umferðaróhapps sem tilkynnt var lögreglu í Reykjavík klukkan 18:34. Minni háttar meiðsl urðu á fólki sem þar kom við sögu. Ökumaður á suðurleið missti stjórn á bíl sínum með með þeim afleiðingum að bíllinn lenti fyrst á kantsteinum sín megin, fór síðan yfir akbrautina og skall af miklu afli á gangaveggnum hinum megin. Við höggið losnaði slökkvitæki í öryggiskassa á gangaveggnum úr festingu sinni og um leið kviknaði sjálfvirkt aðvörunarljós í gjaldskýlinu. Það var fyrsta merkið um óhappið og samstundis var sett í gang ákveðið ferli útkalls og aðgerða í samræmi við nýlega viðbragðsáætlun Hvalfjarðarganga.
Tvennt var í bílnum og var flutt á slysadeild til skoðunar og aðhlynningar. Bíllinn er mikið skemmdur ef ekki ónýtur.
Slökkvilið, lögregla og sjúkralið komu fljótt á vettvang eftir að tilkynning um óhappið barst til Neyðarlínunnar. Vaktmenn í gjaldskýli höfðu þá lokað göngunum og annar þeirra var fyrstur manna á slysstaðinn. Mikilvægur þáttur starfsfólks í gjaldskýli í öryggismálum ganganna var þar með staðfestur enn og aftur. Lögregla var við báða gangamunna og stjórnaði umferð á meðan göngin voru lokuð.
