Öryggishandbók Hvalfjarðarganga er komin út og hefur verið dreift til þeirra sem málið varðar. Hún er afrakstur samráðshóps um öryggismál gangana sem hóf störf í árslok 2001 undir forystu Helga Hallgrímssonar, fyrrum vegamálastjóra.
Í Öryggishandbókinni er meðal annars að finna niðurstöður ýmissa verkþátta sem samráðshópurinn lét vinna að, meðal annars varðandi staðla og reglur, eftirlit með umferð í göngunum og hættumat í göngunum. Í handbókinni er ennfremur birt reglugerð um brunavarnir í samgöngumannvirkjum, samningur um gagnkvæma aðstoð vegna útkalla slökkviliða höfuðborgarsvæðis og Akraness, reglur um flutning hættlegra efna og áætlun um æfingar og þjálfun vegna viðbragðsáætlun fyrir Hvalfjarðargöng.
Viðbragðsáætlun Hvalfjarðarganga er einn af köflum handbókarinnar og jafnframt sá langstærsti og mikilvægasti. Viðbragðsáætlunin var gefin út sérstaklega í vor og tók gildi 10. maí 2004.
Í Öryggishandbókinni er kveðið á um reglubundnar æfingar viðbragðsaðila. Gera má ráð fyrir að fljótlega verði efnt til fjarskipta- og útkallsæfingar í göngunum og slökkviæfingar á næsta ári. Þá er í bígerð að undirbúa umfangsmikla almannavarnaræfingu í og við Hvalfjarðargöng í vor. Slíka æfingu á að halda fimmta hvert ár.
Undirsíður
