Heldur minni umferð var um Hvalfjarðargöng um verslunarmannahelgina í ár en í fyrra. Alls fóru rúmlega 33.000 bílar um göngin frá fimmtudegi til mánudags, um 1.100 bílum færra en á sama tíma í fyrra.

Þessar tölur benda til þess að mannamót á Norðurlandi um verslunarmannahelgina hafi dregið að sér færra fólk af höfuðborgarsvæðinu nú en sumarið 2004. Í fyrra fóru þannig 34.306 bílar um göngin um verslunarmannahelgina en 33.183 bílar í ár.

Athyglisvert er að umferðin var umtalsvert meiri á fimmtudaginn fyrir verslunarmannahelgi í ár en í fyrra og sömuleiðis á sunnudaginn. Heildaráhrifin birtast hins vegar í tölum fyrir föstudag og mánudag. frídag verslunarmanna. Fækkunin er nálægt þúsund bílum hvorn dag miðað við sömu daga í fyrra.

 

Umferðin um verslunarmannahelgi 2005 og 2004

 

 

	2005	2004
Fimmtudagur	6.903	6.486
Föstudagur	8.031	9.057
Laugardagur	5.358	5.601
Sunnudagur	5.761	5.164
Mánudagur	7.130	7.998
Alls	33.183	34.306