Í dag eru liðin rétt 15 ár frá stofnun Spalar og undirskrift fyrsta samnings félagsins við ríkisvaldið. Óhætt er að segja að þessi samkoma í frímúrarahúsinu á Akranesi 25. janúar 1991 hafi skilað því sem efni stóðu til og rúmlega það. Það þekkir þjóð og allra best sá hluti hennar sem ekur undir Hvalfjörð á degi hverjum!
Í tilkynningu til hlutafélagaskrár, dagsettri 25. janúar 1991, kemur fram að tilgangur Spalar sé að
„annast að nokkru eða öllu leyti undirbúning, fjármögnun og framkvæmdir við vegtengingu um utanverðan Hvalfjörð, svo og rekstur hennar um tiltekinn tíma samkvæmt lögum nr. 45 frá 1990 um vegtengingu við utanverðan Hvalfjörð og samkvæmt samningi við samgönguráðuneytið fyrir hönd ríkisins.“
Hlutafé Spalar var ákveðið 70 milljónir króna og stærstu hluthafarnir við stofnun voru Sementsverksmiðja ríkisins (15,1 milljón króna), Grundartangahöfn (13,2 milljónir króna), Íslenska járnblendifélagið (12,6 milljónir króna), Vegagerð ríksins (10 milljónir króna), Akraneskaupstaður (7,5 milljónir króna) og Skilmannahreppur (7,5 milljónir króna).
Helstu driffjaðrir málsins voru í fyrstu stjórn Spalar. Gylfi Þórðarson, framkvæmdastjóri Sementsverksmiðjunnar, var kjörinn formaður og með honum Jón Hálfdánarson, bæjarfulltrúi á Akranesi, Stefán Reynir Kristinsson, fjármálastjóri Járnblendifélagsins, og Gísli Gíslason, bæjarstjóri á Akranesi. Fimmti maður í stjórn var Óli Jón Gunnarsson, bæjarstjóri í Borgarnesi.
- Tveir ráðherrar Alþýðubandalagsins skrifuðu undir samning við Spöl fyrir hönd ríkisins: Steingrímur J. Sigfússon, samgönguráðherra, og Ólafur Ragnar Grímsson, fjármálaráðherra.
