Fréttir 2007

Print

Aftanákeyrsla og stútur undir stýri

Fólksbíl var ekið aftan á jeppa á suðurleið í Hvalfjarðargöngum um kl. 15:30 í gær, sunnudaginn 26. ágúst. Sex manns úr bílunum tveimur voru flutt á sjúkrahús á Akranesi til rannsóknar og aðhlynningar og voru allir útskrifaðir þaðan samdægurs.

Göngin voru lokuð í rúmlega klukkustund vegna óhappsins og var umferð beint fyrir Hvalfjörð á meðan. Margir kusu samt að bíða eftir að opnað yrði fyrir umferð á ný.

Annar bíllinn skemmdist umtalsvert og var dreginn af vettvangi, hinn var ökufær.

Á
Lögregluvefnum var greint frá því eftir helgina að lögregla umrædd aftanákeyrsla hefði átt sér stað nálægt vettvangi þar sem stútur var tekinn undir stýri. Þar segir orðrétt:

Sunnudaginn 26. ágúst barst tilkynning um mikið ölvaðan ökumann á leið frá Reykjavík. Lögreglumaður á frívakt tilkynnti um manninn og reyndi að stöðva för hans á Kjalarnesi en tókst ekki. Ökumaðurinn rásaði á veginum og olli stórhættu. Lögreglumenn stöðvuðu ferðir hans í Hvalfjarðargöngunum. Ökumaðurinn var færður á lögreglustöð og virtist ofurölvi. Á vettvangi stöðvaðist umferð á meðan á lögregluaðgerðinni stóð. Aðvífandi ökutæki var ekið aftan á bifreið sem stöðvuð hafði verið á nálægt vettvangi. Umferð um Hvalfjarðargöngin stöðvðist vegna árekstursins en lögreglumenn af höfuðborgarsvæðinu komu á vettvang og rannsaka málið.

Það skal tekið fram að vaktmenn í gjaldskýli Hvalfjarðarganga fengu ekki tilkynningu um þessa lögregluaðgerð og höfðu ekki vitneskju um hana. Þess vegna var göngunum ekki lokað fyrir umferð eins og efni stóðu til, samkvæmt viðbragðsáætlun fyrir göngin.