Spölur - Hvalfjarðargöng

Umferð í Hvalfjarðargöngum í marsmánuði var 7,2% meiri en í sama mánuði í fyrra. Fjölgunin nemur tæplega 9.800 bílum. og kann að hluta að skýrast af því að hluti páskaumferðarinnar lenti marsmegin við mánaðarmótin.

Öll páskaumferðin í fyrra var í aprílmánuði en nú bar skírdag upp á 1. apríl og því deilist páskaumferðin í ár augljóslega á bæði mars og apríl í umferðarbókhaldi Spalar.

Rekstrarár Spalar er nú hálfnað og staðan í hálfleik 2010 er sú að einungis vantar um 2.800 bíla upp á að jafna umferðartölurnar á miðju rekstrarári í fyrra.

Þegar horft er til góðæris- og glansmyndaskeiðins fyrir kreppu kemur í ljós að 54.000 bíla vantar í umferðartölurnar nú miðað við fyrri hluta rekstrarársins 2007-2008. Umferðin nú er með öðrum orðum hátt í 7% minni fyrstu sex mánuði yfirstandandi rekstrarárs en á sama tímabili fyrir tveimur árum, í aðdraganda hruns íslenskrar krónu um vorið og síðan bankanna um haustið.

• Og svo fróðleiksmoli í lokin að gefnu tilefni. Veggjöld eru talsvert í umræðunni þessa stundina vegna samgönguverkefna sem ríkið ræðir við lífeyrissjóði um að fjármagna. Í Morgunblaðinu í dag er haft eftir vegamálastjóra að á milli 35.000 og 40.000 veglyklar séu nú í bílum landsmanna á vegum Spalar vegna Hvalfjarðarganga. Það skal upplýst að þeir voru nákvæmlega 39.444 talsins í lok mars 2010.

Þetta yfirlit miðast við rekstrarár Spalar, þ.e. frá byrjun október til loka september ár hvert.

*Þ.e. breyting frá sömu mánuðum rekstrarárið 2008/2009