Spölur - Hvalfjarðargöng

Ellefu þúsund fleiri bílar fóru um Hvalfjarðargöng í októbermánuði en í sama mánuði í fyrra, sem er hátt í 8% aukning umferðar. Umferðin á 16 völdum mælingarstöðum Vegagerðarinnar á Hringveginum jókst á sama tíma um 3,3% miðað við sama mánuð í fyrra. Samkvæmt því jókst umferð í göngunum verulega meira en á Hringveginum.

Engin nærtæk skýring er á því að umferð jókst svo mjöggöngunum í október, nema þá sú að vel viðraði á landsmenn og þeir voru  meira á ferðinni en í október í fyrra.

Í mars 2010 mældist umferðaraukning í Hvalfjarðargöngum upp á ríflega 7% en þá fylgdi sögu að hluti páskaumferðarinnar féll til í þeim mánuði en í aprílmánuði árið þar á undan. Það skýrði mikla sveiflu upp í mars en mikla sveiflu niður í apríl.

Í nóvember 2007 mældist mikil sveifla í umferðinni í göngunum, aukning um 17%. Það var heldur ekki marktæk sveifla, því í nóvember 2006 var afskaplega rysjótt og leiðinlegt tíðarfar suðvestanlands í nóvember og fólk var því minna á ferð um þjóðvegina en ella. Umferðin í nóvember 2006 var með öðrum orðum óeðlilega lítil, sem skekkti samanburðinn við nóvember 2007 þegar umferðin var ,,eðlileg".

Í október 2010 jókst sem sagt umferð í göngunum án þess að hægt sé að skýra það á sama hátt og gerðist með sveiflumánuðina mars 2010 og nóvember 2007.

Vegagerðin mældi aukningu alls staðar hjá sér í október 2010 nema á Hellisheiði (3,6% samdráttur) og á Suðurlandi (1,8% samdráttur). Hún segir skýringuna ef til vill vera gott veður. Hvað um það, breytingin er greinileg, því fyrstu tíu mánuði ársins hafði umferðin dregist mikið saman á mælingarstöðum á Hringveginum og reyndar meira en nokkru sinni fyrr frá upphafi mælinga árið 2005.

Þetta yfirlit miðast við rekstrarár Spalar, þ.e. frá byrjun október til loka september ár hvert.

*Þ.e. breyting frá sömu mánuðum rekstrarárið 2009/2010